المجنون هو العاقل.. والعاقل هو المجنون في هذا الزمن المجنون الذي جنّن أفكارنا ذاتا… الدولار.
يقولون الدولار طلع.. ما نزل.
وجنّن السوق جن..خلاهو لاحي ولا ميت.
والحقيقة؟! هو ما جنّن السوق.
هو جنّننا نحنا.. وجنّن الحكومة معانا كمان لا عارفة تقول تعبت ولا عارفة تقول الدولار هو ما ارجل مننا.
الدولار بقى زي الموج.. الصباح فوق، الضهر فوق أكتر، العصر كسّر الحنك، والمغرب عمل حركات جديدة
أربعة مرات في اليوم الواحد.
التاجر يصحى الصباح بسعر، يبيع الضهر بسعر تاني، ويقفل الدكان المغرب وهو ما عارف راسو من كراعو.
بقينا بنحسب بالدولار حتى ونحن بنشتري عيش.
بقينا بنسأل “الليلة الدولار بكم؟” قبل ما نسأل “الأخبار شنو؟”
المواطن بقى محلل اقتصادي غصبا عنه.. والتاجر بقى مضارب بورصة.. والحكومة بقت تلاحق في ظلها..تفتش للابرة وسط كوم المضاربات والسوق الموازي.
المجنون منو؟!
المجنون الزول البخزن الدولار تحت المرتبة؟!
ولا المجنون الزول الببيع بضاعتو الليلة وبكرة ما بلقى يجيب بديلها؟!
ولا نحن المجانين كلنا الساكتين وبنقول “الحال يتصلح براهو”؟!
زمان كنا بنقول “الغلا ولا العطالة”.
اسي بقينا نقول “الغلا والدولار والعطالة والخوف من بكرة”.
السوق ما بقى سوق.. بقى شاشة بورصة مفتوحة 24 ساعة.
وكلنا قاعدين بنتفرج وبنخت يدنا في قلبنا.
يا جماعة.. كفاية لعب بالرهيفة.
محل الرهيفة ينقد عديل كدا..
يا ننتج.. يا نصدر.. يا نزرع.. يا نصنع..
يا نقعد كلنا نتفرج على الورقة الخضراء وهي بتسوق فينا زي الغنم من مراح لي مراح.
الدولار ما مجنون.. نحنا الاديناهو الريموت وبقينا نجري وراهو.
ولو ما صحينا بكرة.. بعد بكرة حنلقى نفسنا بنشتري الموية بالدولار والهوا باليورو.
مش احسن نقلب على التنين الصيني ما اصلوا كلو استيرادنا من عندهم ونعمل المديدة حرقتني مابين الدولار واليوان.. وخلو الشكلة تدور لمن تجيب العجاجة.. رايكم شنو؟! مش أفضل!!
(خمة نفس)
جيش واحد.. شعب واحد.
