يا أ. خالد الأعيسر.. وزير الثقافة والإعلام والسياحة والآثار..
نحن في الجزيرة بنسأل سؤال مشروع:
هل الجزيرة ما في الخريطة عندك؟! ولا ما سمعت عنها أي حاجة!!
كل وزراء حكومة د. كامل إدريس زاروا الجزيرة.. وزير المالية جا، وزير الزراعة جا، وزير الصحة جا، وزير الداخلية جا.. قبل أيام كان هنا عضو مجلس السيادة أ. يحيى عبدالله.. إلا أنت!! نعل مافي عوجة زعلان من منو!!
هل الجزيرة ما فيها ثقافة؟!
هل الجزيرة ما فيها إعلام؟!
هل الجزيرة ما فيها سياحة وآثار؟!
انت مسؤول من الخرطوم والشمالية بس ولا شنو؟!
أظنك لا تعرف أن الجزيرة فيها شيخ المشاريع.. هي عبدالقادر ود حبوبة.. هي أ. علي شمو.. هي المساح.. هي الفنانة سمية حسن .. هي تومات مدني.. هي الشاعر صلاح جميل وجمال عبدالرحيم ونادي الخريجين.. هي الكفر والوتر.. هي الديبة حاجة عجيبة، هي أرض الحضارة والتاريخ.. هي المناقل وطابت وفداسي والحصاحيصا والكاملين.
الجزيرة القدمت الشهداء.. القدمت القوافل.. الاتشردت.. الاتنهبت.. البيوتها اتكسرت.. والليلة رجعت واقفة على حيلها تنفض تراب المليشيا المشؤومة.. تستاهل منك زيارة ولا ما تستاهل؟!
يا سيادة الوزير.. إعلام الجزيرة كان شغال في عز الحرب.. ثقافة الجزيرة كانت بتداوي جراح الناس.. مسارح الجزيرة كانت مستشفى.. وانت وين من دا كلو؟!
نحن كتبنا ليك مرة واتنين.. كنا متوقعين تجي راكض وليس راكب.. لكن الظاهر عندك مشاغل أهم من الجزيرة وانسانها!
الجزيرة ما عايزة منك قروش.. الجزيرة عايزة اعتراف.. عايزة وجود.. عايزة وزير الثقافة يجي يشوف بعينو الدمار الحصل للمسرح والآثار والمكتبات والإذاعة.. واليوم وقفت كلها على حيلها بمجهودات حكومة الولاية.. ما عايزين منكم حاجة، انسان الجزيرة فاهم وواعي وعارف بعمل في شنو!!
كنا عايزنك تشوف بعينك إذاعة ودمدني الاتكسرت.. والمسرح المدمر.. كنا عايزنك تشوف الحاصل وتعيش وجع الناس وثقافتهم الصامدة.
ولا خلاص بقيت وزير للخرطوم بس؟!
ما مشكلة.. خليك هناك.. حكومة الجزيرة وانسان الجزيرة قادر على نفسو.. بس ما يجي اليوم التقول فيهو انا قدمت لمكتبة قصر الثقافة كتاب واحد، ولا حضرت بروفة مسرحية على خشبة المسرح، ولا سمعت أغنية من فناني الغناء الشعبي..
أحسن نخليك في حالك ونشوف غيرك.
يظهر عليك انت مشغول..
خمة نفس أخيرة:
أقولا ليك أ. خالد.. الجزيرة ما بتنسى البقيف معاها.. وما بتنسى البنفضها..
انزل الميدان.. الجزيرة في انتظارك.. قبل ما يكتب التاريخ أنك أول وزير ثقافة يتجاهل ولاية بحجم وطن.
جيش واحد.. شعب واحد..
