00249117741972

info@waadelgezira.com

السودان

  • Home  
  • (خمة نفس)   عبدالوهاب السنجك يكتب : رسالة من مواطن السوق ماشي على مجاعة وانتوا وين؟!
- مقالات رأي

(خمة نفس)   عبدالوهاب السنجك يكتب : رسالة من مواطن السوق ماشي على مجاعة وانتوا وين؟!

    وصلتني رسالة من مواطن من قلب السوق.. من قلب المعاناة.. كتبها بصدق.. وبوجع.. وأنا بدوري أنقلها كما هي.. لأن الصحافة هي السلطة الرابعة.. وصوت المواطن لازم يصل.   أولاً: فوضى السكر.. وسعرين!!   قال لي المواطن:   “في الأيام دي في فوضى حاصلة عند تجار السكر والمستوردين.. قاعدين يبيعوا لينا السكر بسعرين.. يقول […]

 

 

وصلتني رسالة من مواطن من قلب السوق.. من قلب المعاناة.. كتبها بصدق.. وبوجع.. وأنا بدوري أنقلها كما هي.. لأن الصحافة هي السلطة الرابعة.. وصوت المواطن لازم يصل.

 

أولاً: فوضى السكر.. وسعرين!!

 

قال لي المواطن:

 

“في الأيام دي في فوضى حاصلة عند تجار السكر والمستوردين.. قاعدين يبيعوا لينا السكر بسعرين.. يقول ليك السكر كاش بـ 400.. وبنكك 410.. يعني شغالين يبيعوا بالكسر.. والواحد ممكن يبيع ليك بخسارة مقابل انت تجيب ليهو كاش..”

 

بالطريقة دي.. عملوا لينا سيولة في الكاش.. والتجار خموا الكاش كلو من السوق.. والموضوع ده ممكن يعمل أزمة كبيرة.. المواطن بقى يدفع فرق سعر عشان بس يدفع ببنكك.. وده عبث واضح.. وين الرقابة؟ وين الحكومة؟!

 

ثانياً: الخطر الأكبر.. تجار المحاصيل!!

 

“شايف الأيام دي في ناس شغالين يشتروا في المحاصيل من المزارعين بأعلى الأسعار.. يجوا يقولوا ليك الحواشة دي أنتجت كم؟ تقول ليهم مثلاً 40 شوال.. يقول ليك دايرين الـ 40 شوال كلها..”

والدفارات شايلة وماشة وين مش معروف!!

بالطريقة دي.. وصل جوال الذرة أكتر من 900 ألف.. ونحن يا دوب في موسم الحصاد.. يعني لسه في بداية الموسم.. فما بالك بعدين نهاية الموسم.. ممكن الجوال يصل 2000 أو 3000.. لأنو المؤشرات بتقول كده.. تجار الجشع خشوا السوق.. وخموا الكاش كلها من السوق.. وخشوا بيها سوق المحاصيل.. والحكومة قاعدة تتفرج.!!

 

السؤال الذي يطرح نفسه:

 

هل الحكومة لها علم بذلك؟

وليه الحكومة ما تعمل لينا بورصة وتحدد لينا أسعار محاصيل؟؟

وهل القرار بتاع ممنوع خروج المحاصيل خارج ولاية الجزيرة قاعد يتنفذ؟!

 

توصية المواطن:

 

“بتمنى من الحكومة تتدخل وتوقف العبث البحصل في السوق.. بالطريقة دي نحن ماشين على مجاعة..”

 

مرتبات العاملين في القطاع الحكومي ضعيفة.. هسي في زمن الحصاد.. كيلة العيش اتجاوزت 140 ألف.. فما بالك بعد نهاية موسم الحصاد.. المواطن المسكين ياكل من وين؟!

 

ليكم اخيرا :

 

الرسالة دي ما رسالة مواطن واحد.. دي رسالة آلاف المواطنين في الجزيرة.. وفي السودان كلو.

 

نناشد حكومة ولاية الجزيرة.. ووزارة المالية.. ووزارة التجارة.. والجهات الرقابية.. أن تتدخل الآن.. قبل فوات الأوان.. أن توقف فوضى السعرين.. وأن تضبط سوق المحاصيل.. وأن تحمي قوت المواطن المسكين.

 

خمة نفس اخيرة:

نبارك للقوات المسلحة والمساندة الانتصارات في كل المحاور..

 

جيش واحد..

شعب واحد..

وعد الجزيرة

هي صحيفة إلكترونية شاملة، تنطلق من قلب ولاية الجزيرة لتكون منبراً إعلامياً حراً، ونبضاً صادقاً للشارع والمجتمع. نلتزم بتقديم صحافة حديثة، متطورة، وموضوعية تحترم عقل القارئ وتنقل الحقيقة بكل أمانة ودقة.

البريد  : info@waadelgezira.com

الهاتف: 00249117741972

وعد الجزيرة  @2027. جميع الحقوق محفوظة.