قد يأخذ البعض عنوان كتابي من عدة زوايا، منها المنفرجة وآخر الزاوية الحادة.
يقال فلان مصدوم يعني “نفسو مقفولة من أي حاجة” ماعايز كلام ولا اكل والشراب.
أو الزول صدمتو عربية.. الزول الجابو للعربية شنو كمان!!
لكن وقت الصدمة حااار بالذات لم تجيك من الحاكم..
يقيف ويرفع المقاس فوق ويقول أزمة وقود مافي ” يااا راجل” دي الصدمة ذاتااا من جواا الجواا من بيت الكلاوي عدييل.
لكن الصدمة الفيها نحن اليوم مافي زيها تب والله..
مصدومين من الدولار جنس صدمة.
مصدومين من عدم توفير المواد البترولية والكهرباء و.. و..
والصدمة الكبيرة صدمة السوق الما معروف ماشي على وين.. هو مع الدولار ولا معانا نحن؟!
لكن يظهر راكب راس وماشي مع الدولار وحالف ما يرجع تاني..
تخش السوق شايل قروشك في يدك وتطلع مصدوم.. أمس كيلو السكر بسعر والليلة بسعر، أمبارح جالون البنزين أو الجازولين بسعر والليلة بسعر..
والتاجر يقول ليك: الدولار طار.
تسألو الدولار طار وين؟!
يقول ليك ما عارف.. لكن طار!!
والمواطن هو الواقع من الطيارة دي.
لكن الرقابة وين!!
هي ذاتا راقدة رز بسبب الصدمة الدولارية والجماعة المتحكمين في تجارة العملة.
الحكومة .. كل يوم قرار، وكل يوم تصريح، وكل يوم لجنة، والنتيجة الحال في حالو، نشيل الصبر بس..
الدولار يملص جلدنا، والبترول ينشف ريقنا، والسوق يبلع الباقي مننا، والباقين يتفرجو فينا كأنهم مصدومين زينا!
يا ناس.. الصدمة ما بتتعالج بصدمة أكبر منها.. الصدمة بتتعالج بالمواجهة، بالقرار الشجاع، بضربة قوية لتجار العملة ومافيا البترول والاحتكار.
اطلعوا للناس قولوا ليهم الحاصل شنو.. وين الدولار بمشي؟!
وين الجاز بمشي؟!
ومنو البتحكم في قوت الناس؟!
كفاية صدمات.. المواطن بقى ما عندو قدرة ينصدم تاني، لأنو الصدمة الجاية حتكون هي القاضية.
خمة نفس أخيرة:
قالوا الصدمة بتقوي القلب.. لكن الصدمات حتوقف قلب المواطن مرة واحدة.. ألحقوا النبض قبل ما يقيف!
قولوا لينا رايكم شنو!!
شعب واحد..
جيش واحد..
